كل شخص من هو و صغير بياخذ شخص معيّن قدوة و بيعمل متلو،بيتعلم حَكْيو و بيتبع أفكارو و تقاليدو
بقلم ملاك داديخي
بس أنا من صغري بحب كون غير و مختلفة،كرمال هيك أنا ما باخد شخص واحد بس قدوة،كرمال ما لازم نكون نسخة عن غيرنا ، حلو ناخد من كل شخص منيح تصرفاتو المنيحة و هيك منكون مزيج من الأفكار و التصرفات المنيحة بشخصيّة خاصة فينا ما بتشبه حدا.
حبّيت احكي عن ٣ أشخاص مأثرين فيّي و بأفكاري و حسب وجهة نظري بيستحقوا يكونو قدوة و بجدارة.
#رح بلّش بالشخص اللي عطول حدّي اللي هي أمّي،هي قدوتي مش لأنها أمي،هي قدوتي لأن هي اللي بتعلّم منها القوة و كيف لازم فكّر و اتصرّف،و هي اللي بتعلّمني كيف اتغلّب على أقسى المواقف و كون قد حالي و لولا وجودا حدّي لكنت ضعت من أول مشكلة وقعت فيها.
#قدوتي التانية مميزة بالنسبة الي كتير،علي عمر علي رئيس الجمعيّة اللي بفتخر لما احكي عنها و اللي هي بيتي التاني و استاذي بالمدرسة،اخترتو قدوة لأن ما بيشبه و لا أستاذ،و ما بيشبه و لا "leader" مميّز بكل شي
و كل ما شوفو باخد منه الأمل،الأمل بإنّو بعد كل تعب في شي ناطرنا،علي عمر علي صار من أنجح و أقوى الرئساء بسبب تعبو و الإنسانيّة اللي عندو،أهدافو حلوة و بتتمحور حول الإنسانية و مساعدة الناس و المجتمع،مش رح قول إنّي بتمنى بس اكبر كون مطرحو بس رح قول اني بحلم بس اكبر كون عم ساعد الناس و غيّر بالمجتمع للأحسن متلو
#و آخر قدوة الي هي "انجلينا جولي" الكل بيقولو عنها انها الممثلة الحلوة إلّا أنا بحب فيها بس انسانيتها،ما همي شو شغلا و جمالا،بهتم و بحبها لأنها بتعطي الناس حب و إنسانية،بتساعد ناس كتير دون ما تسأل عن جنسيتهم أو دياناتهم و هيدا هدفي و هدف كل متطوع : "العطاء"
About Auther
